An Roinn Oideachais agus Eolaíochta

Department of Education and Science

 

Cigireacht Ábhair ar Eacnamaíocht Bhaile

TUAIRISC

 

Gairmscoil Fheichín Naofa, Corr na Móna

Co. Na Gaillimhe

Uimhir rolla:   71320S

 

Dáta na cigireachta: 15 Bealtaine 2006

Dáta eisiúna na tuarascála: 15 Nollaig 2006

 

 

An Tuairisc Chigireachta seo

Soláthar an Ábhair agus Tacaíocht na Scoile Uile

Pleanáil agus Ullmhúchán

Teagasc agus Foghlaim

Measúnú agus Gnóthachtáil

Achoimre ar na Príomhthátail agus Moltaí

Freagra na Scoile ar an Tuairisce

 

Tuairisc ar Chaighdeán na Foghlama agus an Teagaisc san Eacnamaíocht Bhaile

 

An Tuairisc Chigireachta seo

 

Scríobhadh an tuairisc seo tar éis cigireachta ábhair i nGairmscoil Fheichín Naofa, Corr na Móna, Co. na Gaillimhe. Leagtar amach torthaí na measúnachta ar chaighdeán an teagaisc agus na foghlama san Eacnamaíocht Bhaile agus déantar moltaí d’fhorbairt theagasc an ábhair seo sa scoil. Rinneadh an mheasúnacht seo thar lá amháin. Thug an cigire cuairt ar sheomraí ranga agus breathnaíodh an teagasc agus an fhoghlaim. Bhí teagmháil ag an gcigire leis na scoláirí agus leis an múinteoir. Scrúdaíodh obair na scoláirí agus rinneadh plé leis an múinteoir. Scrúdaíodh doiciméid phleanála na scoile agus ullmhúchán scríofa na múinteoirí. Tar éis na cuairte measúnachta, thug an cigire aiseolas ó bhéal ar thorthaí na measúnachta don phríomhoide agus don mhúinteoir ábhair. Thugadh deis do bhord bainistíochta na scoile ar a thuairim a léiriú ar thorthaí agus ar mholtaí na tuairisce i scríbhinn, agus beidh freagra an bhoird ar fáil san aguisín atá leis an tuairisc seo.

 

Soláthar an Ábhair agus Tacaíocht na Scoile Uile

 

Tá an mheánscoil chomhoideachais seo suite i gceantar Gaeltachta. Cuirtear clár leathan oideachais ar fáil san timthriall sóisearach agus san timthriall sinsearach. Is beag an líon scoláirí atá sa scoil agus is buntáiste suntasach é seo i dtaobh teagaisc agus foghlama.

 

Foghlamaíonn 45% de scoláirí sóisearacha, cailín uilig na scoile an Eacnamaíocht Bhaile. Tá an céatadán seo ag teacht leis an gcéatadán de dhaltaí sóisearacha a fhoghlamaíonn an t-ábhar sa tír iomlán. Is trua, áfach, gur cailíní amháin a thógann Eacnamaíocht Bhaile sa scoil seo agus nach mbíonn deis ag na buachaillí í a fhoghlaim sa sraith sóisearach. Múintear dhá thréimhse shingil agus tréimhse dhúbailte do na scoláirí sa chéad bhliain, sa dara bliain agus sa tríú bliain. Tá na socruithe sin ag teacht le riachtanais an tsiollabais.

 

Déantar rang-ghrúpa amháin de na scoláirí sa chéad agus sa dara bliain go hiondúil mar tá lion na scoláirí beag. Ní léir go bhfreagraíonn an socrú seo do na riachtanais dhifriúla foghlama atá ag an dá ghrúpa seo. Moltar don scoil féachaint chuige go gcuirfear clár leanúnach, céimnithe i bhfeidhm agus go bhfaighfidh gach bliainghrúpa deiseanna foghlama atá in oiriúint dá leibhéal cumais. D’fhéadfaí iad a scaradh óna chéile agus rang leo féin ag an chéad agus an dara bliain i Eacnamaíocht Bhaile as seo amach nó roinnt ranganna breise don dara bliain.

 

Ar meán, roghnaíonn 38% de na scoláirí sinsearacha Eacnamaíocht Bhaile mar ábhar staidéir, líon scoláirí atá ag teacht leis an gcéatadán de scoláirí sinsearacha a fhoghlamaíonn an t-ábhar sa tír iomlán. Faigheann na scoláirí sinsearacha cúig thréimhse sa tseachtain, ina n-áirítear tréimhse dhúbailte. Bíonn rogha ag na scoláirí sinsearacha idir Eacnamaíocht Bhaile agus Foirgneolaíocht. Déantar gach iarracht féachaint chuige go bhfaigheann gach aon dalta a rogha. Tógann formhór na gcailíní Eacnamaíocht Bhaile, maraon le líon beag buachaillí ó am go ham. Níl aon bhuachaill ag tabhairt faoin Eacnamaíocht Bhaile faoi láthair agus is feasach don scoil go gcaithfear suim san ábhar a chur chun cinn i measc na gcailíní agus na mbuachaillí araon.

 

Bíonn an-éileamh ar Eacnamaíocht Bhaile i measc na gcailíní. Moltar don scoil plean a ullmhú agus a chur i bhfeidhm chun an ráta glactha san ábhar a mhéadú i measc na mbuachaillí. D’fhéadfaí tabhairt faoin obair seo ar bhealaigh éagsúla. Ar an amchlár, bíonn Eacnamaíocht Bhaile ar siúl ag an am céanna le Foirgneolaíocht agus Adhmadóireacht. Ba cheart rogha níos oscailte a thabhairt do na buachaillí sa timthriall sóisearach ionas go bhfaighfidh siad taithí ar an ábhar.

 

Moltar do mhúinteoir an ábhair plean a cheapadh chun meas a chothú ar Eacnamaíocht Bhaile ar bhun scoile-uile. D’fhéadfaí clár fógraíochta a úsáid, mar shampla, agus feachtais eolais a eagrú le linn na scoilbhliana faoi ghnéithe éagsúla den ábhar. B’fhiú, freisin, leas a bhaint as na meáin chumarsáide áitiúla chun ócáidí agus imeachtaí a bhaineann leis an ábhar a fhógairt. Moltar taighde a dhéanamh ar na tionchair éagsúla a théann i bhfeidhm ar scoláirí nuair a bhíonn rogha acu idir Eacnamaíocht Bhaile agus ábhair eile.

 

Tógann formhór na scoláirí an t-ardchúrsa san Eacnamaíocht Bhaile. Tá ardmholadh tuillte ag an mbainistíocht agus ag múinteoir an ábhair as an obair a dhéanann siad chun misneach agus féinmhuinín a chothú i measc na scoláirí maidir leis an rogha seo. Múintear scoláirí an ardchúrsa agus scoláirí an ghnáthchúrsa sa rang céanna.

 

Tugann bainistíocht na scoile tacaíocht don ábhar i dtaobh an amchláir, soláthar múinteoirí agus soláthar acmhainní. Bíonn an sciar ama a thugtar don ábhar ag teacht le riachtanais an tsiollabais. Cé nach gcuirtear buiséad ar leith ar fáil don ábhar go bliantúil, cuireann an múinteoir iarratais le h-aghaidh acmhainní breise chuig an bpríomhoide mar is gá. Scaipeann an bhainistíocht cáipéisí a bhaineann leis an siollabas go pras, agus tugtar deis agus ugach don mhúinteoir leas a bhaint as cúrsaí éagsúla a bhaineann lena réimse dualgas. Ghlac an múinteoir páirt le déanaí i seisiúin oiliúna inseirbhíse a chuir Seirbhís Tacaíochta Eacnamaíocht Bhaile na hArdteistiméireachta ar fáil.

 

Cuirtear teagasc ar fáil sna gnéithe éagsúla den Eacnamaíocht Bhaile de réir an tsiollabais. Cuirtear an clár i bhfeidm trí mheán na Gaeilge den chuid is mó. Faigheann roinnt bheag scoláirí atá ar bheagán Gaeilge cabhair bhreise trí mheán an Bhéarla. Déantar gach uile iarracht na scoláirí agus a dtuismitheoirí a choinneáil ar an eolas faoi na h-ábhair atá ar fáil sa scoil. Tugtar treoir, comhairle agus cúnamh dóibh agus iad ag roghnú ábhar. Tá moladh ar leith tuillte ag an bpríomhoide, an múinteoir ábhar agus an múinteoir treoir as a gcuid oibre sa ghnó seo.

 

Múinteoir amháin atá ag an scoil faoi láthair don Eacnamaíocht Bhaile. Tá seomra amháin sa scoil atá in úsáid mar chistin agus mar sheomra fuála. Múintear gach rang Eacnamaíocht Bhaile sa seomra seo. Cé go bhfuil acmhainní agus trealamh réasúnta ann, níl an chistin ná an áit stórála ag teacht le riachtanais an tsiollabais athchóirithe d’Eacnamaíocht Bhaile na hArdteistiméireachta. Níl fean eastarraingthe sa chistin faoi láthair, rud atá ag teastáil go géar. Tá gá le hathchóiriú a dhéanamh ar na háiseanna ionas go mbeidh riachtanais shláinte agus shábháilteachta á sásamh agus obair phraiticiúil ar siúl ag na scoláirí. Tá iarratas ón scoil le Rannóg Pleanála na Roinne Oideachais agus Eolaíochta faoi láthair. Moltar don scoil infheistíocht shuntasach a dhéanamh chun cur leis an soláthar d’áiseanna atá sa scoil don Eacnamaíocht Bhaile agus chun féachaint chuige go gcoimeádfar caoi ar na háiseanna sin.

 

De bharr easpa seomraí sa scoil, úsáidtear an chistin le haghaidh ábhair eile freisin. Chuirfí go mór leis an obair san Eacnamaíocht Bhaile dá gcoimeádfaí an seomra seo don ábhar sin amháin. Ag am lóin, úsáidtear an chistin mar phroinnteach agus áit chruinnithe do na scoláirí. Moltar don scoil deireadh a chur leis an socrú seo ar chúiseanna sláinte agus sábháilteachta. Is léir go mbíonn an cleachtas sna seisiúin Eacnamaíocht Bhaile ag teacht le polasaí sláinte agus sábháilteachta na scoile. Tá moladh ar leith tuillte ag múinteoir an ábhair as an obair a rinne sí ar an bpolasaí seo agus ar ráiteas sláinte agus sábháilteachta an tseomra Eacnamaíocht Bhaile.

 

Tá moladh tuillte ag múinteoir an ábhair agus ag an bpríomhoide as an obair atá déanta chun leas a bhaint as teicneolaíocht faisnéise agus cumarsáide (TFC) chun teagasc agus foghlaim san Eacnamaíocht Bhaile a fheabhsú. Tá an leathan-bhanda ar fáil sa scoil anois agus tá moladh tuillte ag an scoil as ríomhaire glúine agus teilgeoir a chur ar fáil do na múinteoirí. Áirítear ríomhaire agus teilgeoir mar chuid de na háiseanna atá ar fáil sa seomra Eacnamaíocht Bhaile. Bíonn seomra na ríomhairí ar fáil freisin le haghaidh teagasc an ábhair seo. Bíonn teilifíseán agus fís-théipthaifeadán ar fáil freisin. Moltar go ndéanfar tuilleadh machnaimh ar úsáid na TFC chun an teagasc san Eacnamaíocht Bhaile a shaibhriú. Moltar don scoil cur leis an soláthar d’áiseanna ríomhaireachta atá sa scoil.

 

Pleanáil agus Ullmhúchán

 

Tugtar deis do na baill foirne páirt iomlán a ghlacadh i bhforbairt polasaithe mar chuid de phleanáil forbartha na scoile. Glacann na múinteoirí páirt i gcúrsaí inghairme a chabhraíonn leo san obair seo. De bhrí nach bhfuil ach an múinteoir amháin sa scoil don Eacnamaíocht Bhaile, níl aon ghá le comhordaitheoir foirmeálta don ábhar. Sonraítear go mbíonn cumarsáid agus comhoibriú inmholta idir na múinteoirí maidir le pleanáil traschuraclaim. Bíonn teagmháil rialta ag an múinteoir Eacnamaíocht Bhaile le múinteoirí éagsúla maidir leis seo, go háirithe iad sna hábhair seo a leanas: Eolaíocht, Bitheolaíocht, Staidéir Ghnó, Oideachas Sóisialta, Pearsanta agus Sláinte (OSPS), Gairmchlár na hArdteistiméireachta (LCVP) agus TFC. Sa bhealach seo, féachtar chuige nach mbíonn na cláir éagsúla ag teacht trasna ar a chéile. Pléitear freisin socruithe chun freastal ar na leibhéil éagsúla chumais i measc na scoláirí.

 

Is inmholta an ardchaighdeán pleanála agus ullmhucháin a shonraítear san Eacnamaíocht Bhaile. Cuirtear scéimeanna cuimsitheacha ar fáil don fhadtréimhse agus don ghearrthréimhse, ina n-áirítear plean oibre don fhíodóireacht. Leagtar na scéimeanna amach de réir riachtanais na siollabas. Déantar tagairt iontu don amchlár, modheolaíocht, acmhainní agus modhanna measúnaithe. Is léir ón ullmhúchán scríofa go ndéantar comhtháthú idir na gnéithe éagsúla den chlár agus go leagtar béim chuí ar theoiric agus ar obair phraiticiúil araon. Oibríonn an múinteoir ábhair agus an príomhoide i gcomhar lena chéile go coinsiasach chun athbhreithniú a dhéanamh go rialta ar chúrsaí pleanála don ábhar agus tá árd-mholadh tuillte dá bharr.

 

Tá réimse an-mhaith d’acmhainní teagaisc don Eacnamaíocht Bhaile ar fáil sa scoil, ina n-áirítear leabhair thagartha, liostaí, foilseacháin oiriúnacha agus fístéipeanna. Cuirtear leabharlann Eacnamaíocht Bhaile ar fáil don mhúinteoir agus do na scoláirí. Moltar go gcuirfear go rialta leis an stór áiseanna atá sa leabharlann seo. Is léir ón teagasc go n-ullmhaíonn an múinteoir go cúramach roimh ré. Leagtar cuspóirí oiriúnacha teagaisc amach go soiléir agus sonraítear dul chun cinn inmholta san fhoghlaim. Baintear feidhm thairbheach as teilgeoirí, bileoga, leabhair agus an gclár dubh le linn an teagaisc. Úsáideann an múinteoir ábhair scéimeanna marcála Choimisiún na Scrúduithe Stáit chomh maith le Tuarascáil an Phríomhscrúdaitheora chun í féin a chur ar an eolas faoi fhorbairt pleananna oibre don Teastas Sóisearach agus Teastas Sinsearach. Tá taithí aici mar Scrúdaitheoir Cúnta don Teastas Sóisearach. B’fhiú don mhúinteoir leanúint d’úsáid a bhaint as an siollabas Eacnamaíocht Bhaile, as na treoirlínte do mhúinteoirí agus ábhair oiriúnacha eile chun an phleanáil a éascú.

 

Déantar pleanáil an-chúramach chun freastal ar scoláirí le riachtanais speisialta oideachais i ranganna Eacnamaíocht Bhaile. Cuirtear tréimhsí breise ar fáil do scoláirí áirithe. Bíonn teagmháil rialta ag an múinteoir Eacnamaíocht Bhaile leis an múinteoir tacaíochta foghlama. Féachtar chuige go mbíonn na hábhair foghlama in oiriúint do riachtanais foghlama na scoláirí. Tá an cleachtas seo ar aon dul le polasaí na scoile maidir le scoláirí le riachtanais speisialta.

 

Cuireann ardchaighdeán na pleanála go mór le caighdeán na múinteoireachta agus na foghlama san Eacnamaíocht Bhaile. Aithnítear agus moltar díogras, dúthracht agus proifisiúntacht an mhúinteora i dtaobh seo.

 

Teagasc agus Foghlaim

 

Sonraítear ard-chaighdeán teagaisc agus foghlama sna ceachtanna Eacnamaíocht Bhaile. Leagtar síos cuspóirí soiléire foghlama agus cuirtear an t-ábhar foghlama ós comhair na scoláirí go héifeachtach. Ar an iomlán, sonraítear torthaí an ullmhúcháin chúramaigh i saibhreas agus leanúnachas an chláir theagaisc. Éiríonn go maith leis an oide comhtháthú éifeachtach a dhéanamh idir na gnéithe éagsúla den ábhar. Bíonn luas na gceachtanna in oiriúint do riachtanais na scoláirí.

 

Baintear úsáid as modhanna feiliúnacha teagaisc atá in oiriúint do leibhéil chumais agus suime na scoláirí. Mínítear an t-ábhar foghlama go héifeachtach agus ceistítear na scoláirí go sciliúil. Sonraítear éagsúlacht inmholta sa chur chuige. Tugtar deiseanna do na scoláirí tabhairt faoi thascanna i ngrúpaí, ina mbeirteanna agus ina n-aonar. Tugtar deiseanna dóibh páirt a ghlacadh i réiteach fadhbanna agus in imeachtaí gníomhacha eile a fheileann do na leibhéil éagsúla chumais. Is léir go ndéanann an múinteoir dianmhachnamh ar na bealaí chun an t-ábhar foghlama a chur in oiriúint do na scoláirí le riachtanais speisialta. Éiríonn leis an múinteoir suim san ábhar a chothú i measc na scoláirí agus iad á ngríosadh go héifeachtach chun foghlama. Déantar an-iarracht chun scileanna ardoird smaointeoireachta a fhorbairt i measc na scoláirí. Chonacthas taispeántas de straitéisí a bhí go hán-mhaith mar chuid den obair phraiticiúil. Tugadh deis do na scoláirí aithris a dhéanamh ar an bpróiseas agus moltar an cleachtas seo go hard.

 

I bhformhór na ranganna, baintear úsáid éifeachtach as réimse d’acmhainní oiriúnacha, ar nós osteilgeoirí, notaí múinteora, freagraí samplacha, leathanaigh oibre, leabhair thagartha, liostaí, foilseacháin oiriúnacha, fístéipeanna/DVDs, trealamh cistine/fuála, an idirlín agus an clár, chun an teagasc a fheabhsú agus an fhoghlaim a dhaingniú. Bunaítear cuid de na ceachtanna ar na téacsleabhair agus saibhrítear iad trí cheistiú agus trí mhíniú éifeachtach. Tugtar faoi leagan amach agus cur i láthair na gceachtanna ar bhealach a éascaíonn tuiscint agus meabhrú an ábhair foghlama. Eagraítear turais allamuigh go rialta agus spreagtar na scoláirí chun páirt a ghlacadh i gcomórtais éagsúla. Tá ardmholadh tuillte ag an múinteoir Eacnamaíocht Bhaile as an obair dhíograiseach a dhéanann sí ar mhaithe leis na scoláirí faoina cúram. Caitheann sí an-chuid ama ar chúrsaí ullmhúcháin chun cinntiú go mbíonn sé ar chumas na scoláirí tabhairt faoi na gnéithe éagsúla den scrúdú trí mheán na Gaeilge. Ag an am céanna, déantar freastal cóir ar na scoláirí a dhéanann an scrúdú trí Bhéarla.

 

Sonraítear deá-chaidreamh idir an múinteoir agus na scoláirí. Cuireann sí na ceachtanna i bhfeidhm go taitneamhach, molann sí na scoláirí go minic agus cothaíonn sí misneach iontu. Taispeántar cairteacha agus samplaí d’obair na scoláirí chun atmaisféar spreagúil a chothú sa seomra ranga. Stiúrtar na himeachtaí éagsúla go hordúil agus meallann an múinteoir na scoláirí chun cloí leis na rialacha soiléire iompair atá leagtha síos aici. Cothaíonn an dea-chaidreamh atá acu leis an múinteoir dearcadh dearfach i measc na scoláirí maidir leis an Eacnamaíocht Bhaile. Is léir, ar an iomlán, go gcaitheann an múinteoir go tuisceanach leis na scoláirí agus go mbíonn siadsan sona, socair faoina cúram. Is áit spreagúil a chuirfeadh fonn foghlama ar dhalta é an seomra ranga. Tá taispeántais postaerí agus samplaí d’obair phraiticiúil agus d’obair scríofa na scoláirí crochta suas sa seomra chun suim a mhúscailt.

 

Is léir go dtuigeann na scoláirí go mbíonn an múinteoir ag súil le hardchaighdeán oibre uathu. Bíonn rún ag formhór acu an t-ardleibhéal a dhéanamh. Is léir, ó cheistiú na scoláirí, go mbíonn tuiscint chuí acu  ar ábhar an chúrsa. Bíonn siad ábalta ceisteanna éagsúla, ina n-áirítear ceisteanna cuimhne agus ceisteanna ardoird, a fhreagairt go cumasach. Baintear úsáid éifeachtach as obair bhaile chun an fhoghlaim a bhuanú. Bíonn sé de nós ag an múinteoir, ag deireadh an cheachta, eolas a thabhairt do na scoláirí maidir leis an gcéad cheacht eile. Cuireann sé seo go mór le leanúnachas na foghlama agus le tuiscint na scoláirí ar an dul chun cinn atá á dhéanamh acu.

 

Ó dhearcadh ar obair na scoláirí, tá sé soiléir go ndéantar forbairt éifeachtach ar na scileanna oiriúnacha. Bíonn caighdeán na hoibre tionscadal san Fíodóireacht, Cúram Leanaí agus Ceardaíocht le moladh. Léiríonn na scoláirí an-chumas in eagrú agus cur i láthair an ábhair staidéir. Tugann an múinteoir treoir chuí do na scoláirí san obair thionscadail. Ar an iomlán, baintear feidhm an-tairbheach as an obair thionscadal chun cumas cruthaitheachta agus scileanna eolais na scoláirí a chur chun cinn. Sonraítear ardchaighdeán san obair phraiticiúil agus san obair scríofa. Bíonn na scileanna agus an t-eolas a fhaigheann siad in oiriúint d’aois agus do chumas na scoláirí.

Measúnú agus Gnóthachtáil

 

Tá réimse de mhodhanna measúnaithe in úsáid go rialta san Eacnamaíocht Bhaile chun dul chun cinn na scoláirí a scrúdú agus chun cinntiú go mbíonn dóthain taithí acu ar dhéanamh scrúduithe. Déantar measúnú múnlaitheach ar na scoláirí go minic trí cheistiú sa rang agus trí obair bhaile. Úsáidtear modhanna éagsúla le linn an teagaisc chun fianaise den fhoghlaim a fháil. Tugtar scrúduithe scríofa do na scoláirí go minic ag deireadh aonaid oibre. Tá polasaí scoile-uile i bhfeidhm maidir le hobair bhaile agus dialann an scoláire. Marcáileann an múinteoir an obair bhaile nó déantar athbhreithniú air mar obair ranga. Bíonn tréimhse staidéir eagraithe ceithre thráthnóna sa tseachtain. Ar an iomlán, tá ardmholadh tuillte ag an múinteoir as an mbealach a úsáidtear an obair bhaile agus as caighdeán an mheasúnaithe i gcoitinne.

 

Déanann na scoláirí sa chéad bhliain, sa dara bliain agus sa tríú bliain scrúduithe foirmeálta i Mí na Nollag agus ag deireadh na scoilbhliana. Déanann na scoláirí sa cheathrú bliain scrúdú amháin in aghaidh an téarma. Déanann na scoláirí sa triú agus sa chúigiú bliain scrúduithe míosúla. Chomh maith leis na Scrúduithe Stáit, tugann na scoláirí seo faoi scrúduithe Nollag agus reáchtáiltear trial scrúdaithe san Earrach. Coinníonn an múinteoir ábhair cuntas leanúnach ar thorthaí na scrúduithe, agus coimeádann sí teagmháil rialta leis na scoláirí maidir lena ndul chun cinn san ábhar. Déantar athbhreithniú ar dhul chun cinn an scoláire agus socraítear leibhéal na scrúdaithe i gcomhar le múinteoir an ábhair agus leis na tuismitheoirí. Cuirtear tuairiscí scríofa ar dhul chun cinn na scoláirí aonair chuig na tuismitheoirí/caomhnóirí. Pléitear dul chun cinn freisin ag na cruinnithe idir thuismitheoirí agus mhúinteoirí a eagraítear go bliantúil. Úsáidtear irisleabhar na scoile freisin chun eolas a scaipeadh.

 

Leagtar béim inmholta ar an tábhacht a bhaineann le staidéar agus scrúduithe agus cothaítear dea-nósanna foghlama i measc na scoláirí. Sonraítear sár-obair na scoláirí sna fillteáin staidéir, leabhair nótaí agus cóipleabhair. Coinníonn an scoil cuntas ar thorthaí na Scrúduithe Stáit agus déanann an foireann teagaisc anailís orthu ag tús na scoil bhliana.

 

 

Achoimre ar na Príomhthátail agus Moltaí

 

Is iad seo a leanas na príomhnearta agus na réimsí le haghaidh forbartha a aithníodh sa mheasúnacht:

 

Mar bhealach le togáil ar na nearta seo agus chun dul i gceann réimsí le haghaidh forbartha, tá na moltaí seo a leanas á ndéanamh:

 

Eagraíodh cruinnithe iarmheasúnachta leis an múinteoir Eacnamaíocht Bhaile agus leis an bPríomhoide ag deireadh na measúnachta nuair a cuireadh na dréacht-thátail agus na moltaí i láthair agus nuair a pléadh iad.

 

 

 

 

 

 

Aguisín

 

Freagra na Scoile ar an Tuairisce

 

Arna chur isteach ag an Bord Bainistíochta

 

 

 

 

 

 

Réimse 1:    Tuairimí ar ábhar na tuairisce scoile

 

 

 

Réimse 2:   Gníomhartha leantacha a rinneadh nó atá beartaithe le déanamh ó cuireadh críoch leis an ngníomhaíocht chigireachta chun tátail agus moltaí na cigireachta a chur i bhfeidhm