An Roinn Oideachais agus Eolaíochta

Department of Education and Science

 

Meastóireacht Scoile Uile

TUAIRISC

 

 

Scoil Chaomháin,Inis Oirr, Contae na Gaillimhe

Uimhir rolla:17289V

 

Dáta na cigireachta: 3 Deireadh Fómhair 2008

 

 

 

 

Meastóireacht scoile uile

Réamhrá – comhthéacs agus cúlra na scoile

Cáilíocht na bainistíochta sa scoil

Cáilíocht na pleanála sa scoil

Cáilíocht na foghlama agus an teagaisc

Cáilíocht na tacaíochta do dhaltaí

Achoimre ar thorthaí agus ar mholtaí d’fhorbairt bhreise

Freagra na Scoile ar an Tuairisc

 

 

 

 

Meastóireacht scoile uile

 

Rinneadh meastóireacht scoile uile ar Scoil Chaomhán sa bFómhar 2008. Léiríonn an tuairisc seo torthaí na meastóireachta agus déanann sí moltaí i leith tuilleadh forbartha ar obair na scoile. Dhírigh an mheastóireacht ar cháilíocht an teagaisc agus na foghlama sa Bhéarla, sa Ghaeilge, sa Mhatamaitic agus san Eolaíocht. Tugadh deis do bhord bainistíochta na scoile ar a thuairim a léiriú ar thorthaí agus ar mholtaí na tuairisce i scríbhinn, agus beidh freagra an bhoird ar fáil san aguisín atá leis an tuairisc seo.

 

 

Réamhrá – comhthéacs agus cúlra na scoile

 

Tá beirt oidí ag feidhmiú sa scoil Ghaeltachta seo lonnaithe ar Inis Oirr i gcuan na Gaillimhe. Tá cliú agus cáil ar an oileán seo de bharr a ghleoiteacht nádúrtha, gnaoiúlacht na ndaoine, an cultúr saibhir Gaeilge atá ar an oileán agus an seandálaíocht a ghabhann chomh fada siar le míle cúig chéad bliain roimh aimsir Chríost. Tá iarsmaí stairiúla brataithe ar an oileán ó theacht na strainséaraí le linn cúlú ré na leac oighre, go hiarsmaí de chaisleán na mBrianaigh, tiarnaí an oileáin sa séú aois déag. Tá an scoil féin suite ar cholba thoir an chora i mbéal na trá ar shuíomh charcarach ghleoite ardaithe os cionn na farraige. Osclaíodh an foirgneamh seo i Mí Feabhra 1942 le trí sheomra ranga inti agus is beag caiteachas a déanadh ar an bhfoirgneamh ó shoin seachas na leithris seachtaracha a chur faoi dhíon na scoile. De bharr méid measa an phobail ar an scoil agus ar an oideachas go ginearálta, coinníodh an foirgneamh go glan slachtmhar maisithe thar na mblianta. Tá gá anois forbairt íomlán a dhéanamh ar fhoirgneamh agus clós na scoile chun na háiseanna agus caighdeán na cóiríochta a thabhairt suas chuig caighdeán na linne.

Baintear úsáid as an seomra ranga folamh mar ionad do na seirbhísí bhreise atá anois sa scoil cosúil leis an tseirbhís tacaíochta foghlama agus acmhainne, chomh maith le seirbhísí ó oiliúnóirí in úirlísí ceoil agus scileanna cluichíochta. Tá clós crua stroighin a shíneann ó thuadh de chlós na scoile agus tá seoltán agus seomra stórála suite sa gcuid seo den chlós faoi láthair. Tá clós imeartha de thalamh garbh gainneamhach ó dheas den scoil. Tá droch chaoí ar ar an gcuid seo den chlós agus tá sé cuntúirteach do dhaltaí mar ionad súgartha. Is gá deisiú a dhéanamh ar seo a luaithe agus is féidir. Tá carcar leacach beag ar chúl an chlóis a bhíonn á úsáid mar ionad cluichíochta agus is gá cóiriú a chur ar seo freisin chun úsáid shábháilte mar pháirc cluichíochta a bhaint as.

Tá isliú suntasach tagtha ar ionrollú na scoile seo le scór bliain sa chaoí gur fiche cúig dalta atá cláraithe sa scoil faoi láthair. Níl aon rang a haon sa scoil agus is dalta amháin atá i rang naonán shinsearach. Meastar gur i laghad a bheidh na huimhreacha ag dul sa ghearrthodhchaí.

 

Léiríonn an tábla thíos eolas ginearálta ar fhoireann na scoile agus ar na daltaí a bhí cláraithe sa scoil nuair a bhí an mheastóireacht ar siúl:

 

 

Líon

Daltaí ar rolla na scoile

25

Ranganna príomhshrútha sa scoil

7

Múinteoir(í) ar fhoireann na scoile

2

Múinteoir(í) ranga príomhshrutha

2

Múinteoir(í) ag obair i bpoist tacaíochta

1

Cúntóirí riachtanas speisialta

1

 

 

1.     Cáilíocht na bainistíochta sa scoil

 

1.1 Sainspiorad misean nó fís na scoile

Tagann daltaí uile na scoile ó theaghlaigh le Gaeilge agus is cainteoirí dúchasacha le saibhreas teanga iad formhór acu. Is é misean na bpáirtithe scoile ná oideachas caitliceach a sholáthar do na daltaí in atmaisféar ceannúil sona sábháilte a chuirfidh na daltaí chun cinn go h-intleachtúil, spioradálta, fisiciúil, agus cultúrtha agus chun deiseanna comhionnanach oideachais a chur ar fáil do gach dalta de réir a chumas. Éiríonn leis an scoil an ráiteas misean seo a bhaint amach in atmaisféar sona dearfach inar féidir le daltaí forbairt agus fás a dhéanamh mar réiteach don iarbunscolaíocht agus chun páirt a ghlacadh sa domhan mór. Dearbhaítear sa ráiteas misean go mbeidh an scoil ag comhoibriú sa chur chuige leis na tuismitheoirí agus tá an scoil ag déanamh iarrachtaí fiúntacha na tuismitheoirí a cheangal le gníomhaíochtaí foghlama na scoile. Dearbhaíodh ag na cruinnithe réamhthuairisce gur athrú é seo ar thraidisiún na scoile agus go bhfuil na tuismitheoirí thar a bheith sásta leis an athrú. Tá moladh tuillte ag foireann na scoile as ucht a gcuid dea iarrachtaí ardú a chothú i gcaighdeáin na scoile, croinicí na scoile a thabhairt suas chun data agus plean scoile a chruthú do ghníomhú na scoile, cé go mar phríomhoide feidhmiúil atá an príomhoide fostaithe le trí bliana anois agus go mar ionadaí atá an cúntóir nua cheaptha ag gníomhú faoi láthair.

 

1.2   An bord bainistíochta

 

Bíonn cruinnithe ag an mbord bainistíochta faoi chúig in aghaidh na bliana nó níos minice má bhíonn gá leis. Is athchóiriú scoile an príomh aidhm atá ag an mbórd anois agus tá súil acu go mbeidh conraitheoirí ar an suíomh chun tús a chur leis an obair, roimh dheireadh na bliana. Tá an bórd tofa faoi rialacháin na Roinne Oideachais agus Eolaíochta, ceaptar clár oibre i gcóir na cruinnithe agus tá oifigí aitheanta mar is cuí ar an mbord. Gníomhaíonn an bord go hiomlán trí Ghaeilge, coinnítear smacht ar chaiteachas agus bhí na miontuairiscí agus cuntas airgid ar fáil don chigireacht seo. Glacann an bord leis na freagrachtaí atá leagtha orthú agus tá ráiteas polasaithe acu anois ar raon leathan de ghníomhaíochtaí na scoile. Tá caomhnú páistí agus córas maoirseachta chun sábháilteachta páistí ináirithe sa phlean scoile le freagrachtaí chuige seo leagtha ar dhaoine aitheanta. Is fiú dualgais post freagrachta a aimsiú don chúntóir nua-cheaptha chun tacaíochtaí breise a thabhairt don phríomhoide. Is gá don bhord uasdátú a dhéanamh ar chuid de na polaithe seo de bharr na tuairisce, chomh maith le hathraithe reachtaíochta agus cleachtais le blianta anuas. Is fiú plean ar pheideolaíocht scoile a chruthú san ath-bhreithniú seo chomh maith le sainiú a dhéanamh ar an gcur chuige idirdhealaithe a úsáidtear sa teagasc agus foghlaim. Is gá freisin plean forbartha scileanna foirne agus plean dírithe ar mhír 9 (h) den Acht um OIdeachais (1998) a chur leo seo. Pléadh leis an mbórd na bealaigh éagsúla chun úinéaracht don phlean a roinnt leis na tuismitheoirí chomh maith leis na nósanna coitianta chuige sin. Is fiú teagmháil a dhéanamh leis an t-ionad teanga áitiúl atá urraithe ag Údarás na Gaeltachta ar an oileán, chomh maith leis na eagraíochta eile leasmhara Gaeltachta chun comhaontú a dhéanamh ar an bplean. Cuirtear tuismitheoirí ar an eolas faoi dhul chun cinn a bpáistí trí chruinnithe faoi dhó sa bhliain ar a laghad agus cuirtear fáilte roimh theagmhálacha eile neamhfhoirmeálta le linn na scoilbhliana.   

 

1.3 Bainistíocht inscoile

 

Tá raon leathan seirbhísí ar fáil sa scoil seo agus déantar bainistíocht éifeachtach orthu. Tá an príomhoide feidhmiúil ag obair sa scoil le trí bliana agus oide sealdach nua-cheaptha a thosaigh sa scoil i mbliana. Tá an bheirt acu inniúil gairmiúil agus éifeachtúil i mbun oibre. Faigheann siad cabhair fáilteach ón oide acmhainne agus tacaíochta foghlama páirt aimseartha atá ag feidhmiú sa scoil. Is inmholta freisin an dua agus an dúthracht a chaitheann an cuntóir ranga leis an dalta atá faoina cúram agus an tacaíocht a thugann sí do ghníomhaíochtaí na scoile i gcoitinne. Ní bhíonn an bheirt seo páirteach sna cruinnithe foirne a eagraítear tar éis am scoile ach bhfiú don oide tacaíochta freastal ar chuid de na cruinnithe ag braith ar an gclár cruinnithe. Tá ranganna na scoile roinnte idir na hoidí le ranganna naonán agus rang a dó le chéile faoi chúram an phríomhoide agus ranganna trí, ceathair, cúig agus sé faoi chúram an chúntóra nua-cheaptha. Cinntíonn said beirt go mbíonnn atmaisféar suáilceach sábháilte sa scoil chomh maith le clár forásach oideachais a bheith ar fáil do na daltaí. Cleachtaítear dea-mhódhanna múinte, úsáidtear fearas agus bogábhar tacaíochta go rialta agus tá beartais i leith breis úsáide na teicneolaíochta san oideachais á chur le chéile faoi láthair. Baintear úsáid as an tacaíocht airgeadais faoi scéim D.E.I.S agus an t-airgead a fuarthas anuraidh faoi scéim na gcuntas dímhaoine, chun seirbhísí agus deiseanna breise a sholáthar do dhaltaí na scoile. Cé go bhfuil an scoil scoite amach ón mórthír, bíonn an scoil páirteach in iliomad imeachta agus comórtais ar an mórthír. Bíonn féilire gníomhach imeachtaí ar an oileán chomh maith idir fheiseannna, lá patrúin, idirchaidrimh le scoileanna a thugann cuairteanna bliantúla ar an oileán cosúil le Scoil Naithí, Scoil Chabra agus Scoil Naomh Cíosóg, chomh maith le bheith rannpháirteach in obair chórach eaglasta agus cheolchoirmeacha ar an oileán. Moltar na hoidí as ucht a ndíogras agus proifisiúntacht ag iarraidh úinéaracht a ghlacadh ar chur chuige agus caighdeáin oideachais na scoile seo. Tá siad beirt fiúntach agus coinsiasach, soláthraíonn siad clár foirfe oideachais do na daltaí agus éilíonn said scileanna neamhspleáchais foghlama a chruthú a luaithe agus is féidir.

 

 

1.4 Bainistíocht an chaidrimh agus na cumarsáide le pobal na scoile

 

Dhearbhaigh an bord bainistíochta agus ionadaithe na dtuismitheoirí a sástacht le héifeacht agus proifisiúntacht na n-oidí agus le feidhmiú na scoile anois ag na réamhchomhdhálacha don tuairisc seo. Tá obair mhór ar siúl sna iarrachtaí scoile tuismitheoirí a bheith páirteach i ngníomhaíochtaí oideachais a bpáistí trí scéimeanna urraithe faoin scéim D.E.I.S. agus cinntítear atmaisféar suáilceach fáilteach don phobal sa scoil. Coinnítear an fhoirgneamh maisithe agus glan taobh istigh agus taobh amuigh agus glacann an scoil páirt leanúnach i dtionscnaimh éagsúla sóisialta agus curaclaim. Coinnítear na seomraí uile agus pasáiste na scoile tarraingteach le saothar na ndaltaí ar ghnéithe curaclaim agus abháir tionscnaimh eile agus is breá an taifead iad seo ar scileanna na ndaltaí. Is fiú breis úsáide a bhaint as infheistíocht teicneolaíochta na scoile trí nuacht litir tréimhsiúil a sholáthar don phobal ina léirítear gníomhaíochtaí suimiúla na scoile agus áitiúla. B’fhiú freisin nasc leictreonach a chothú le scoileanna eile ar oileáin i gcéin agus i gcóngar chomh maith le scoileanna Gaeltachta agus Galltachta ar an mórthír.

 

1.5 Bainistíocht daltaí

 

Tugadh suntas don ghaol oscailte cineálta idir na páirtithe scoile. Déanann fiche cúig dalta freastal ar an scoil faoi láthair agus úsáideann oidí agus daltaí céad ainmneacha lena chéile ina gcomhchaidrimh.  Bíonn an tinnreamh ard i gcónaí agus is leasc leis na daltaí aon lá scoile a chailleadh.  Cuirtear clár oibre forásach spreagúil os comhair na ndaltaí, cuirtear béim ar chothú neamhspleáchais scileanna agus ullmhaítear iad go maith don iar-bhunscoil. Is annamh ar gá don fhoireann dul i muinín an cód smachta sa scoil agus is iondúil go dtugann na daltaí sinsearacha aire chineálta do na daltaí soisireacha sna himeachtaí scoile.

 

2.     Cáilíocht na pleanála sa scoil

 

2.1 Pleanáil scoile uile agus pleanáil don seomra ranga

 

Aontaíodh athraithe a dhéanamh ar ghnéithe den phlean le linn na tuairisce seo agus go gcuirfidh an plean faoi bhráid na dtuismitheoirí ar bhonn réamh aontaithe leis an mbord. Socraíodh freisin go mbeadh cóipeanna de na pleananna oideachais pearsanta níos iomláine le spriocanna cinnte gníomhaíocta iontu agus go ndéanfaí tuairiscí scríofa a sholáthar ar gach dalta faoi dheireadh na scoilbhliana. Cé go bhfuil sé deacair ar oidí atá ag feidhmiú i rólanna sealadacha, úinéaracht a ghlacadh ar pholasaithe forbartha agus i gceapadh straitéis chun todhchaí na scoile a threorú, tá ard mholadh tuillte acu de bharr a gceannródáiochta san obair go dtí seo. Tá croinicí na scoile tugtha suas chun dáta agus tá plean feidhmiúil scoile curtha le chéile ar phríomh ghnéithe imeachta na scoile. Aontaíodh freisin ag iarchomhdháil na tuairisce seo an t-ord phriarachta a thabharfaí do na pleananna nua atá fós le ceapadh. Is gá infheistíocht suntasach a dhéanamh in áiseanna oideachais na scoile, go háirithe in úirlísí meastóireachta agus tacaíochta do na daltaí, daltaí le riachtanais speisialta san áireamh. Tuigtear go mbeidh sé seo dúshlánach i bhfianaise an obair fhorbartha atá le déanamh ar fhoirgneamh agus clós na scoile faoi láthair. Is gá freisin plean infheistíochta leabharlainne agus fearas a chinntiú agus is cabhair mhór an úsáid rialta a bhaineann na daltaí scoile as leabharlann phoiblí an oileáin faoi láthair. Tá an chabhair a thugann an leabharlannaí i roghnú agus i bhfíosrú leabhair oiriúnacha do na daltaí le moladh. 

 

Úsáidtear raon leathan modheolaíochta sa dá sheomra ranga cosúil le grúp obair, obair ranga, obair bheirte agus obair aonair, cé go bhfuil seomra na n-ardranganna an chúng chuige seo. Bíonn an teagasc agus an fhoghlaim spreagúil agus tioncharach dá réir. Déantar iarracht mhacánta prionsabail an churaclaim a chur i bhfeidhm sa clár teagaisc agus foghlama agus is fiú anois na cleachtais chuige seo, go háirithe na cleachtais ar dhifrealú curaclaim agus úsáid na meastóireachta chun an clár léinn a aithint do dhaltaí ar leith, a chur faoi réir an phleanscoile. Tá iarracht idir láimhe caighdeáin na scoile a ardú agus tá moladh tuillte as an gcomh iarracht comhordaithe atá ar siúl i measc na foirne. Bíonn cruinnithe leis na tuismitheoirí ar dhul chun cinn na ndaltaí faoi dhó sa bhliain agus cothaítear eascaíocht mhór do na tuismitheoirí teagmháil a choinneáil leis an scoil.

 

 

2.2 Polasaí agus nósanna imeachta um chaomhnú daltaí

 

Cuireadh deimhniú ar fáil, faoi réir Imlitir Bunscoile 0061/2006 ón Roinn Oideachais agus Eolaíochta, go bhfuil glactha go foirmiúil ag an mbord bainistíochta leis na Treoirlínte do Bhunscoileanna um Chaomhnú Daltaí (An Roinn Oideachais agus Eolaíochta, Meán Fómhair 2001). Cuireadh deimhniú ar fáíl freisin gur díríodh aire na bainistíochta, na foirne scoile agus na dtuismitheorí ar na nósanna imeachta seo um chaomhnú daltaí; gur soláthraíodh cóip de na nósanna imeachta do bhaill uile na foirne (na baill nua uile san áireamh); agus go bhfuil deimhin déanta de ag an mbainistíocht go dtuigeann an fhoireann ar fad na nósanna imeachta atá le leanúint. Tá duine ainmnithe idirchaidrimh agus ionadaí idirchaidrimh ceaptha de réir mar a éilíonn na treoirlínte.

 

 

3.     Cáilíocht na foghlama agus an teagaisc

 

3.1 Teanga

 

An Ghaeilge

Baintear úsáid as an nGaeilge mar theanga teagaisc agus cumarsáide sa scoil seo seachas le linn múineadh an Bhéarla. Cuirtear béim ar theagasc na Gaeilge mar úirlís fhoghlama agus déantar saibhriú agus forleithniú ar soifisticúlacht nádúrtha teanga na ndaltaí dá réir. Tá spiorad rannpháirtíochta agus sástachta follasach sa gcur chuige agus cothaítear féin mhuinín agus treallúsacht na ndaltaí san obair. Baintear úsáid as ‘Séideán Sí’ agus as raon téacsleabhar chun scileanna léitheoireachta a chothú agus úsáidtear an leabharlann scoile chun léitheoireacht thaoitheanach a chothú. Is fiú infheistíocht suntasach a dhéanamh sa leabharlann, go háirithe sa chnuasach leabhar nua-aimseartha Ghaeilge atá inti faoi láthair. Is fiú freisin an leabhar fílíochta a ceapadh sa scoil i 1972 a bheith sa stoc leabharlainne chomh maith le scríbhneoirí eile comhaimsire sa Ghaeilge chun cleachtadh na léitheoireachta a threisiú. Cothaítear na scileanna macnaimh ard-ord go rialta sa churchuige agus baineann na daltaí caighdeáin chreidiúnacha amach a thagann lena n’inniúlacht nadúrtha. Tugtar faoi raon leathan ábhair ceapadóireachta agus scríbhneoireachta sa scoil, ghlac na daltai páirt i scéim scríobh leabhair anuraidh agus dírítear aire ar na meicnicí chomh maith. Baintear úsáid rialta as tionscadail agus téamaí taighde chun comhghaolú a cheangal idir na gnéithe curaclaim. Is fiú deiseanna a thabhairt do na daltaí a gcuid saothar scríbhneoireachta a chur i láthair pobal níos leithne tríd an idirlíon agus trí fhoillsiúcháin tréimhsiúla ón scoil féin.

 

 

English

A structured approach is used to the development of a variety of skills in English. Due emphasis is placed on developing oral language skills, phonological awareness as well as structured reading and writing programmes of work. Emphasis is placed on the communicative approach through drama, circle time and discussion, and an excellent anthology of poetry and rhyme is offered to develop language appreciation. Parents are encouraged to engage in shared reading exercises with the pupils, personal reading is a leisure activity practised by all the pupils and further investment in library books in English is required. Writing is taught in a developmental fashion with editing and re-writing being a feature of the approach. Pupils’ progress is carefully monitored through a variety of assessment procedures including teacher observation, questioning, written tasks, correction of copies and books and the use of standardised tests. 

 

3.2 Matamaitic

 

Bíonn obair mheabhrach mar chleachtas rialta sa chlár oibre matamaitice chomh maith le díriú  ar chothú téarmaíocht na mhatamaitice sa dá theanga. Úsáidtear ceardlanna oibre agus as ábhar coincréideach chun tuiscint ar na bunchoincheapa a fhorbairt cé go treoraíonn na téachleabhair go príomha an clár oibre. B’fhiú anois breis úsáide a bhaint as matamaitic na timpeallachta chun feidhmiúlacht na matamaitice a léiriú do na daltaí. Eagraítear grúpobair go héifeachtach chun freastal ar raon cumas na ndaltaí sna ranganna difriúla agus baintear úsáid thairbheach as gníomhaíochtaí chun na spriocanna teagaisc a chur i bhfeidhm. Tugtar deiseanna do na daltaí scileanna tuair agus meastacháin a fhorbairt agus is inmholta na straitéisí a úsáidtear chun scileanna i réiteach fadhbanna a chur chun cinn.

 

 

3.3 Eolaíocht

 

Cuirtear béim sa phlean scoile ar chothú na scileanna riachtanach d’eolaithe cosúil le iniúchadh ar tréithe, gaoil, tuar, triail, agus téamaí taighde bunaithe san ullmhúchán phearsanta ar na snáitheanna agus snáithaonaid atá sa churaclaim. Bíonn daltaí rannpháirteach in obair comhoibritheach, baineann siad úsáid as fearas agus bogábhar tacaíochta don anailís agus cláraítear torthaí na dtriail go leanúnach. B’fhiú úsáid a bhaint as na cúntóirí tacaíochta curaclaim sa ghnéith oibre seo chomh maith agus clár oibre a cheapadh a bheadh ceangailte go dlúth i dtús báire le imshaoil agus taithí an oileáin. Is cóir go mbeadh fórsaí farraige agus gaoithe, eiceolaíocht mara agus caomhnú stoc éisc, sruthanna agus réalteolais clúdaithe sa chlár chomh maith le gnéithe eile a bhaineann le saol an oileáin ach nach mbeadh clúdaithe sna téacsleabhair. Moltar an feachtas atá idirláimhe tionchar na teicneolaíochta i gclár léinn na ndaltaí a ardú.

  

 

 

3.4 Measúnú

 

Usáidtear tástálacha caighdeánacha chun monatóireacht a dhéanamh ar dhul chun cinn na ndaltaí. B’fhiú cur le raon na dtástálacha a úsáidtear chun cláir léinn aonaracha a aithint de réir cumas na ndaltaí agus torthaí na meastóireachta a chlarú de réir ranga. Is fiú straitéis bhreise cosúil le breathnóireacht oide, liostaí seiceála, bailiúcháin oibre, samplaí oibre, tionscadail, tascanna agus trialacha a dhearann na hoidí féin a chur san áireamh sa phróiséas meastóireachta. Is fiú iad a úsáid chun léargas a thabhairt do thuismitheoirí ar dhul chun cinn agus na torthaí a sheoladh chucu i bhfoirm tuairisce ag deireadh na scoilbhliana.  

 

 

4.     Cáilíocht na tacaíochta do dhaltaí

 

4.1 Daltaí a bhfuil riachtanais speisialta oideachais acu

 

Tugtar seirbhís choinsiasach do na daltaí le riachtanais speisialta a dhéanann freastal ar an scoil. Cinntítear rochtain agus rannpháirtíocht do na daltaí uile ar bhonn cothrom, i ngníomhaíochtaí na scoile. Soláthraíonn an t-oide tacaíochta foghlama múinteoireacht sa bhreis sa Bhéarla agus sa Mhatamaitic do dhaltaí a bhfuil deacrachtaí léinn acu agus leantar clár cothú foirfeachta agus cothú scileanna daltaí. Is trí aistharraingt ón rang i ngrúpaí nó ar bhonn aonair an múnla coitianta oibre cé go mbaintear úsáid as comh-mhúinteoireacht sna ranganna ar bhonn rialta sna hardranganna.

 

B’fhiú go mór dá bhféadfaí rochtann a chinntiú ar fhearas agus ar thaithí do dhalta le riachtanas speisialta, san ionad speisialta oideachais atá tairiscí dó go páirt aimseartha, i scoil ar an mórthír. Bheadh gá le socraithe speisialta taistil a dhéanamh chomh maith le cláir oibre a chomhaontú leis na teiripithe tacaíochta, chun an buntáiste is fearr a bhaint as an ionad. Is inmholta an tacaíocht ghoilliúnach a thugann an cúntóir riachtanais speisialta don dalta faoina cúram chomh maith le bheith gníomhach in obair scoile i gcoitinne. Soláthraíonn sí seirbhís goilliúnach freagrach do dhaltaí na scoile trí chéile.

 

4.2 Tacaíochtaí eile do dhaltaí: iad siúd atá faoi mhíbhuntáiste agus daltaí ó ghrúpaí mionlaigh nó grúpaí eile

 

Dearbhaíonn an scoil gur daltaí comhchosúla áitiúla daltaí uile na scoile seo faoi láthair. Tá an scoil ag feidhmiú faoi chlár D.E.I.S. agus baintear úsáid tioncharach as an mbuiséad chun seirbhísí agus taithí bhreise a sholáthar ar bhonn réamh aitheanta. Is fiú clár aontaithe agus aitheanta a dhearadh faoin scéim seo agus i gcomhar le scéim an chiste díomhaine. Is gá an scéim oibre a bheith aontaithe agus faofa ag cruinnithe an bhoird ag tús na scoilbhliana.

 

 

 

5.  Achoimre ar thorthaí agus ar mholtaí d’fhorbairt bhreise

 

Is iad seo a leanas na láidreachtaí a aithníodh sa mheastóireacht:

·         Tá dea-iompar agus comhoibriú na ndaltaí le moladh.

·         Moltar dearcadh, éifeacht agus dúthracht oidí ina gcuid oibre.

·         Tá timpeallacht thioncharach foghlama cruthaithe sa scoil.

·         Déantar dea-chúram de dhaltaí le riactanais speisialta agus le deacrachtaí foghlama .

 

Mar bhealach le togáil ar na láidreachtaí seo agus chun dul i gceann réimsí le haghaidh forbartha, tá na moltaí seo a leanas á ndéanamh:

 

·         Plean uasghrádú foirgnimh agus chlóis na scoile.

·         Uasgrádú ar an bplean scoile.

·         Athbhreithniú ar ghnéithe den churaclaim agus deiseanna do dhaltaí.

·         Clár oibre réamh aontaithe ar chaiteachas D.E.I.S. agus ar íocaíochtaí ó Chiste na gCuntais Díomhaoine.

 

 

 

Eagraíodh cruinnithe iarmheastóireachta leis an bhfoireann agus leis an mbord bainisíochta mar a ndearnadh na dréacht-thorthaí agus moltaí na meastóireachta a chur i láthair agus a phlé.

 

 

 

Foilsithe Eanáir 2009

 

 

 

Aguisín

 

Freagra na Scoile ar an Tuairisc

 

Arna chur isteach ag an Bord Bainistíochta

 

 

 

Réimse 1:    Tuairimí ar ábhar na tuairisce scoile

 

Bhí muid an sásta leis an tuairisc, agus buíoch don Chigire.  Thug sé deis dúinn é a phlé leis an mBord Bainistíocha agus d’fhreagair sé ceisteanna agus thug sé soiléiriú

 

 

 

Réimse 2:   Gníomhartha leantacha a rinneadh nó atá beartaithe le déanamh ó cuireadh críoch leis an ngníomhaíocht chigireachta chun tátail agus moltaí na cigireachta a chur i bhfeidhm

Tá muid ag déileáil leis na moltaí, leathunach 7